Za serbske ludowe zastupnistwo
Für eine sorbische/wendische Volksvertretung

Nachylny jadnański pórěd za Serbski sejm

Toś ten jadnański pórěd twóri nachylny zakład za pósejźenja Serbskego sejma. Wón nasta we wědobnju, až njehobstoje dotychmest žeden pórěd daniž hustawki. Dalej huchada toś ten jadnański pórěd z pozitiwnego pśedsudka wótpósłańcow a ze žycenja wó se raźecej komunikaciji. Na hužywanje rěcy, kótaraž hužywa hobroty hobeju rodowu, se do dalokeje měry źiwa. Pśi tekstowych wótrězkach, kótarež tomu njewótpowěduju, płaśe formulacije weto za hobej roda.

(1) Pósejźenje jo zjawne. Wšykne wótpósłańce maju pšawo na nagrono a su do głosowanja wopšawdnjone. Wjednistwo pósejźenja móžo tež gósćam powědańske pšawo pódaś.

(2) Pó wótwórjenju pósejźenja ma se zwěsćiś pśibytnosć wótpósłańcow.

(3) Na zachopku pósejźenja ma se pśedstajiś dnjowy pórěd a maju se hobzamknuś póžedanja wó změny. Pótom ma se dnjowy pórěd hobzamknuś.

(4) Wjednistwo pósejźenja ma se huzwóliś pśez naraźenje a wótgłosowanje ze zwignjenim ruki a z jadnoreju wětšynu.

(5) Wjednistwo pósejźenja zestaji w diskusijach lisćinu powědarjow. Pó jeje slěźe dajo se słowo, a hob cas debaty wóna se hudopołnujo. Płaśece jo pšawo prědnego grona.

(6) Wó pósejźenju ma se pisaś protokol. Wjednistwo pósejźenja póstajijo wjeźenje protokola. Protokol orientěrujo se pó wótběgu pósejźenja. Protokol ma se pó pósejźenju wót protokolanta a wót wjednistwa pósejźenja pódpisaś a zjawnosći mimo komuźenja spśistupniś. Protkol dej w kuždem paźe hopśimjeś:

  • (a) datum, zachopjeńk a kóńc pósejźenja,
  • (b) lisćinu pśibytnych,
  • (c) pósłowny slěd póžedanjow a jich wótpowědny huslědk,
  • (d) bytostne měnjenja za póžedanje a pśeśiwo njomu,
  • (e) słowne pśizjawjenja, kótarež huraznje se do protokola daju.

(7) Huraznje jo žycone, wó pósejźenju zukowe a hobrazowe nagrawanja zgótowiś.

(8) Za jasnje wótgranicowany temowy hobłuk móžo zgromaźina na póžedanje hugroniś nadawki jadnotliwym wósobam. Nadawki, pšawa a zawězki kaž tež casowe hobgranicowanje nadawkow maju se pśez hobzamknjenje póstajiś.

(9) Za wěcne hobstojnosći, wótgranicowany temowy hobłuk abo konkretny nadawk móžo zgromaźina na póžedanje hutwóriś źěłowe kupki a jich wjednistwo pómjeniś. Zaměr źěłoweje kupki jo huźěłanje póžedanjow za zgromaźinu. Sobuźěło w źěłowej kupce njejo hobgranicowane.

(10) Póžedanja maju se pisnje pśed pósejźenim zapódaś na kandidatojo@serbski-sejm.de. Wóni musy měś mě póžedarja/ow, pśedmjat póžedanja a joli až trjeba tež hobtwarźenje.

(11) Póžedanja wó změnu změnje póžedanja w swójej wěcy abo w hugótowanju. Póžedanja wó změnu zapódaju se wjednistwu pósejźenja pisnje. Wó nich se rozsuźijo pśed głownym póžedanim. W měrje ako zgromaźina póžedanym změnam pśigłosujo abo wóni se wót głownego póžedajucego pśewzeju, pódajo se głowne póžedanje w pópšawjonem hobźěłanju k hobzamknjenju.

(12) Wšykne póžedanja trjebaju za hobzamknjenje absolutnu wětšynu wótpósłańcow. Wšykne wótpósłańce maju pšawo, zapódaś pśeśiwjenje.

(13) Huzwólenja za dawanje nadawkow pśewjadu se pśez zwignjenje ruki a trjebaju za huzwólenje absolutnu wětšynu wótpósłańcow. Wšykne wótpósłańce maju pšawo na pśeśiwjenje.