Serbske ludowe zastupnistwo
Sorbische/wendische Volksvertretung
Sorbian/Wendish People’s Representation

Wobzamknjenje Serbskeho sejma žada sej hnydomne zakónčenje wotbagrowanja serbskich sydlišćow

Dnja 9. měrca schadźowaše so Serbski sejm w Hodźiju. Tam je so wosebje namjet k hnydomnemu zakónčenju brunicoweho hórnistwa we Łužicy horco diskutował, kotryž je so po přiměrjenjach wobzamknył.

W tutym wobzamknjenju žada sej Serbski sejm wot Zwjazkoweje republiki, zwjazkowej krajow Braniborskeje a Sakskeje, kaž tež wot hórnistwowych předewzaćow, zo so serbske wjeski wot nětka hižo wot brunicoweho hórnistwa njezniča. Potrjechene zawody a dźěłopřijimarjo měli prawomyslne financielne wurunanje dóstać za straty w dochodach, rentach a wobsydstwje. Dale žada sej Serbski sejm, zo so wšitke kulturelne, ekologiske, materielne a imaterielne škody, kotrež su přez wudobywanje brunicy nastali, narunaja. To wopřija tež, zo so přez brunicowe hórnistwo wobškodźene a potrjechene płoniny zaso tak renaturuja, zo so zaso wužiwać móža.

K spěchowanju hospodarskeje strukturneje změny a derjeměća Łužicy maja so statne naprawy realizować. Serbski sejm žada sej wot Zwjazkoweje republiki a zwjazkowej krajow Braniborskeje a Sakskeje kompetency, zo so wot nětka při rozdźělenju srědkow za trěbne naprawy sobu zapřija a zo w přichodźe přez wužiwanje resursow w serbskim sydlenskim rumje (sobu) postajuje.

Wróćo