Serbske ludowe zastupnistwo
Sorbische/wendische Volksvertretung

Nadźija za serbske wosady při planowanej strukturnej reformje

16. julija rozwołwjachu so zastupjerjo Serbskeho sejma w Hodźiju/Göda ze zastupjerjami ewangelskeje wosady, Serbskeho wosadneho zwjazka, sakskeho Krajneho cyrkwinskeho zarjada a ze superintendentom cyrkwinskeho wobwoda wo wuskutkach planowanych cyrkwinskich strukturnych reformow na serbske cyrkwinske žiwjenje. Na městnje knježachu wobmyslenja wo hrožacym nowym marginalizowanju serbskeho – tón raz dla rozpušćenja farskeho městna w serbskim sydlenskim rumje přesahowacej strukturje. Na zakładźe próstwy wo podpěru z boka serbskich wosadnych bě Serbski sejm stejnišćo na cyrkwinske wjednistwo pósłał z próstwu wo rozmołwu.

Po tym, zo přednjesechu wosadne wšelake argumenty a žadanje, zo byštej so zdźeržałoj samostatnosć a prawo rozsudźenja na městnje, pokaza Hajko Kozel, předsyda wuběrka „Wustawa a prawo", cyle jasnje na to,zo hižo pohlad na dospołnje zasahowace zhubjenje rěče a kultury pola ewangelskich Serbow, kotremuž njebě ewangelska cyrkej wosebje w poslednich dwěsćě lětach zadźěłała, ale kiž je zdźěla sobu podpěrowała, wujasni aktualnu historisku zamołwitosć ewangelskeho crkwinskeho wjednistwa za proserbske rozsudy: „Na času stej wurunowaca sprawnosć a kultura, kiž zmóžni zmócnjenje serbskeho wósadneho žiwjenja. Krajnocyrkwinski zakoń za naležnosće serbskich wosadnych njesmě być žadyn »papjerjany tiger«, ale dyrbi so runje při nětřišich strukturnych debatach konsekwentnje nałožować“, tak Kozel.

Superintendent Tilmann Popp měješe zrozumjenje za to, zo dyrbja w strukturnych debatach zajmy serbskich wosadnych wažnu rolu hrać. Wón pokaza na to, zo bě wot spočatka swójeho skutkowanja w lěće 2019 do hižo wot 2017 běžaceje strukturneje debaty w cyrkwinskim wobwodźe přinjesł naležnosće Serbow Hodźijskich stron hišći raz znowa do diskusije. We wokomiku přewjedu so rozmołwy w regionje. Rozwjazanje móže wšak so jenož namakać z přihłosowanjom wštkich wobdźělenych cyrkwinskeho wobwoda w ramiku cyrkwinskeho strukturneho zakonja.

Dr. Měrćin Krawc, wotpósłanc sejma a tohorunja Hodźijski wosadny pokaza na negatiwne nazhonjenja při komunalnych teritorialnych reformach, kiž wjedźechu hižo k přewuknjenju w politice, štož by dyrbjało tež cyrkwinske wjednistwo k rozmyslowanju pohnuwać. Město nanuzowanych naprawow bychu so dyrbjeli tež tu w přichodźe móžnosće dobrowólneho zhromadneho dźěła poskićeć.

Wyši krajny cyrkwinski rada dr. Thilo Daniel, zamołwity za serbske temy při sakskim Krajnym cyrkwinskim zarjedźe, na kóncu rozmołwy přilubi, zo přednjesene měnjenja a specifiske serbske naležnosće jara kruće bjerje a zo rozsudy jeno hromadźe z potrjechenymi wosadami twori. Wón bě optimistiski, zo namaka so rozwjazanje na zakładźe wot sakskeje krajneje synody wobzamknjeneho Wosadneho strukturneho zakonja, kiž wotstroni wobmyslenja a strachi wosebje tež pola serbskich wosadnych a tola dźiwa na naležnosće wokolnych wosadow regiona. Wón steji jako přisłušny partner za prašenja wosadow w tutym zwisku tež dale k dispoziciji. Tutón rezultat rozmołwy zastupjerjo sejma witachu a chcedźa proces nadal přewodźeć a podpěrać.

Wróćo