43. Pósejźenje Serbskego sejma

Dnja 29. junija jo se Serbski sejm zmakał na swójo pósejźenje w „parli Łužyce“ Grodk/Spremberg we wěcej generaciskem centrumje „Górski groźik“.

Nejpjerwjej jo se oficielnje kubłański koncept Serbskego sejma wózjawił, kótaryž pomina sebje samozastojne serbske šulstwo a to něnto za zjawnosć k dispoziciji jo.

W ramiku póruconych rozgronow za gósći su cłonki grodkojskeje iniciatiwy Natura Grodk rozkładowali swóje hobmyslenja pśeśiwo planowanjam kuporowego górnistwa (na zakłaźe wšakorakich hobśěženjow hobswěta a wósebnje hobgrozenja lokalnego zestaranja ze stroweju pitneju wódu dla) a ku parkoju wětšnikow w měsćańskem parku. Hubuźone bu to pśez hobšyrne stojnišćo Serbskego sejma ku kuporowemu pśedewześeju wót septembra 2023.

Hušej togo su se hopóznali z aktualneju 15. rozpšawu zwězkowego kněžaŕstwa. K tomu měła se naźěłaś slězynowa rozpšawa, pśeto na nastupnosći serbskego luda njejo se w dosegajucej měrje glědało.

Głowne śěžyšćo pósejźenja jo było 2. cytanje naśiska za statne dogrono mjazy serbskim ludom a nimskim statom (ze Zwězkom a krajoma). W pśiducej kšoceni dej wón se diskutěrowaś a pśespytowaś z ekspertkami a ekspertami europskego mjeńšynowego a narodnego pšawa. Na to kśě teke pśepšosyś zastupnikow stata.

Pśiduce hobradowanje buźo dnja 24. awgusta w Dešnje/Dissen.