45. pósejźenje Serbskego sejma na groźe Ortenburg w Budyšynje
Dnja 26. oktobra 2024 jo se w Źiwadle na groźe w Budyšynje wótměło 45. pósejźenje Serbskego sejma. Pósejźenje jo pśinjasło rěd wažnych temow k diskusiji, kótarež pótrjefiju pśichod serbskich institucijow a serbskego zgromaźeństwa.
Ako rozgronowej partnaŕce pśi tradicionelnje se wótměwajucej wuměnje z gósćimi stej se wuwitałej z Andreju Pawlikoweju, muzejownicu w Serbskem muzeju, a Hanku Jenčec, serbskeju dramaturgowku pśi Nimsko-Serbskem ludowem źiwadle, dwě zastupnicy na groźe statkujuceju serbskeju institucijowu. W diskusiji su se nadrobnje diskutěrowali notne strukturelne a personelne wupominanja, ako njedostatk na dorosće we wobłukach technika, zastojnstwo, graśe a serbskorěcneje źiwadłoweje pedagogiki. Wobstoj trjebnosć, rěcne zamóžnosći w serbskich institucijach skšuśiś a rěc spěchujuce iniciatiwy ako Zari dalej wutwariś. Mimo togo bu naraźone zarědowaś wósebny fondsa za financěrowanje lichych sobuźěłajucych w graśu, pśi sufolěrowanju a w pśełožku. We wobłuku muzeja ma se rownocasnje lajska seś skšuśiś a pódpěrowaś.
Kulturnopolitiski wuběrk sejma pśewzejo toś te temy. Procuju se, zapśimjeś dalšne serbske kulturne institucije aktiwnjej do źěła wuběrka.
W slědujucem sejmowem plenumje jo se dojadnało, w drugem cytanju pśedłogu Statnego dogrona wó rědowanju samo- a sobupóstajeńskich pšawow serbskego luda něnto ako mjazystaw zjawnje diskutěrowaś a k tomu pśepšosyś wšyknych zajmowanych a serbske institucije a zwězki.
Nominěrowanje kandidata za Serbsku radu pśi Sakskem krajnem sejmje se dalej pógónjujo z oficielnym pismom na prezidenta krajnego sejma a frakcijam. Mimo togo su se dalej wótgłosowali wjelerake nadawki pśi dopołnje cesnoamtskej organizaciji wólbow do 2. Serbskego sejma. Mj. dr. zachopijo se skóro socialna media-kampanja.
Až do 22. nowembra mógu se kandidaty nominěrowaś. K tomu se w zajmje šyrokeje personelneje baze sejma dalej napomina. K financěrowanju pśewjedu se dalšne darjeńske kampanje. Doněntejšne wuwiśe nabrankow pokazujo se pozitiwnje.