Serbske ludowe zastupnistwo
Sorbische/wendische Volksvertretung

Pósejźenje Serbskego sejma w Běłej Wóźe: Strukturna změna / Program k samopóstajenju / ILO 169 / Źěk z cerkwje / Financowańska pšosba

Dnja 17. apryla jo Serbski sejm na pśepšošenje běłkojskego hušego šołty hobradował w tamnišej radnicy (z wideo-pśizamknjenim). W swójom póstrownem nagronje jo k. Torsten Pötzsch Serbam žycył statkownjejšy politiski głos kaž tež wjele huspěcha pśi pśedstojecych jadnanjach k statnemu dogronu. Wón rozpšawjašo wó zmócnjenju prezence serbskeje rěcy w měsćańskej zjawnosći Běłeje Wódy. Starobna prezidentka sejma E. Pjeńkowa huźěkowašo se hušemu šołśe hutšobnje za jogo pódpěru sejmowego źěła. Z póglědnjenim na swójske wójnske nazgónjenja ako góle hugranjašo se wóna starosćiwje wó aktualnej diskusiji wó huwiśu Běłeje Wódy na wójaŕske stojnišćo a pleděrowašo za ciwilne, na pśichod husměrjone źěłowe městna w ramiku strukturneje změny a za demilitarizaciju Łužyce.

Śěžyšćo hobradowanja běšo mimo hobzamknjenja „Programa k demokratiskemu samopóstajowanju serbskego luda“ wóne njedawno pśez Zwězkowy sejm wótměte ratificěrowanje ILO 169, UN-hujadnanje k šćitoju indigenych ludow, kaž tež z togo hurosćece pšawa za serbski lud. Pśi tom zwěsći se widobny informaciski deficit w ludnosći. Tak wiźi se zdźěla samo hyšći wšedne nosenje laźwinoweje šorcycki ako bytnostna kakosć indigenych ludow, źož se tola w hopšawźitosći pó cełem swěśe indigenita a nowocasna wašnja žywjenja w žednem paźe njehuzamkujotej. Toś tomu kubłańskemu njedostatkoju co Serbski sejm pśez wšakorake informaciske pórucenja wótpomagaś a z diskusijnymi formatami proces hutwórjenja měnjenjow w serbskem luźe póhušyś. Na jogo kóńcu stoj ta za hužywanje pšawow rozsudna subjektiwna definicija ludu ako indigeny pśez serbske ludowe zastupnistwo, ako centralny definiciski kriterium wótpowědnje art. 1 teje ILO-konwencije.

Wózjawił jo se tež źěkowański list ewangelskego serbskego superintendenta Christopha Rummela. Lěcrownož njejo se pópšawny zaměr swójskeje struktury w hobłuku serbskego sedleńskego teritorija dojśpił, jo weto wjelebócna pódpěra Serbskego sejma jasnje skšuśiła poziciju serbskich kśesćijanow a jo tež wjadła k někotarym substancielnym pólěpšenjam, tejerownowsći jo se wšyknym hobźělonym hobstaśe a pšawa serbskeje mjeńšyny w hobłuku Sakskeje krajneje cerkwje wjelgin jasnje huwědobniło.

Wó pógibowanju pla Załožbje za serbski lud w nastupnosći pšosby institucionelnego spěchowanja rozpšawjašo financny huběrk. Pódaś maju se wšake pódłožki, kótarež se aktualnje zestajaju.

Slědk