Serbski sejm gratulěrujo nowyma serbskima radoma w Bramborskej a Sakskej

W Bramborskej a Sakskej buštej nowej serbskej raźe wuzwólonej. Serbski sejm gratulěrujo nowym raźcam a žycy jim, aby mógali politiske rozsudy w Bramborskej resp. Sakskej na pozitiwnu wašnju wobwliwowaś. Serbski sejm jo na konstruktiwnej zgromadnosći a mjazsobnej pódpěrje zajmowany, aby situaciju serbskego luda pólěpšył.

W Sakskej su cłonki serbskeje rady wuzwólili pśez krajny sejm. Serbski sejm woblutujo, až jogo wót Smy z.t. nominěrowany kandidat dr. Tomaš Wornar wót krajnego sejma njejo dostał dosć głosow. Z tym jo wětšyna krajnego sejma cełkownje bóžko ignorěrował pominanja Europejskeje rady, zapśimjeś wšakorakosć w serbskem ludźe. 53 głosow pak jo weto pócesćeński wuspěch, źěkujomy se frakcijam, kótarež su głosowali za našogo kandidata.

Wósebne wuzwignjenje zasłužyju mjaztym wěcej razow wuproběrowane wólby serbskich radow w Bramborskej: wóni pśewjeduju se lichotnje wót serbskego luda w Bramborskej. Wóni su pśikład za wólby do Serbskego sejma ako cełoserbske ludowe zastupnistwo. Wšykne serbske zjadnośeństwa mógu kandidatow nominěrowaś, wšykne pśisłušniki serbskego luda mógu se wuzwóliś.

Serbske rady su zapołožone ako pśirady krajneju sejmowu w Bramborskej a Sakskej ako teke pśi sakskem statnem kněžaŕstwje. Serbski sejm rozmějo se napśeśiwo tomu ako parlamentariske zastupnistwo k wutwórjenju politiskeje wóle serbskego luda a co w serbskich kaznjach krajowu pśemósćiś wobstojecu politisku rozdoru za serbski lud. Dłujkodobnje procujo se Serbski sejm wó wutwórjenje serbskeje korporacije pó zjawnem pšawje. Pśez to móžo se serbski lud wót cysto póraźujuceje funkcije emancipěrowaś k pśewześu swójskeje zagronitosći. To by teke rozšyriło ramik za źěłabnosć serbskich towaristwow a kšywowego zwězka Domowina.

Wólby do drugego Serbskego sejma wótměju se hyšći až do 27.02.2025. Wólaŕki a wólarje mógu se pisnje abo online za wólby registrěrowaś. Wó 24 mandatow póžedajo se 39 kandidatkow a kandidatow.