Zwězkowy ministaŕ Hubertus Heil jo wótwórjony za rozgrona wó pšawach Serbow

UNO jo póstajiła za lětosny źeń indigenych ludow 9. awgusta slědujuce moto: „Nikogo slědk njewóstajiś. Indigene ludy a pominanje za nowym towarišnostnym dogronom.“ Serbski sejm wiźi se stakim na pšawej droze k wěcej pšawam za serbski lud. Hajko Kozel, powědaŕ huběrka „hustawa a pšawo“, jo gronił pśi góźbje hoglěda zwězkowego ministarja za źěło a socialne, Hubertusa Heila (SPD), 7. awgusta w Budyšynje: „Z deklarěrowanim Serbow ako indigeny lud 12. junija jo spśistupnił Serbski sejm serbskemu ludoju mócny pšawniski zakład: ILO-konwenciju 169. Za dojśpiśe jogo nejwažnješych zaměrow – rozmjej demokratije, pšawow samopóstajowanja ako teke kubłańskeje a kulturneje awtonomije – móžo se něnto tež pokazaś na pšawnisku normu, kótaruž jo Nimska ratificěrowała a kótarejež doźaržanje UNO kontrolěrujo.“ Ministaŕ jo se na pśepšosenje kandidatki za Zwězkowy sejm z Kamjenca, Kathrin Michel (SPD), w Serbskem domje hobźělił na zjawnem rozgronje. Tam jo se pśizamknuł měnjenju, až su Serby indigeny lud a jo był wótworjony za rozgrona wó pśiducnem nałožowanju ILO169 w Nimskej. Na iniciatiwu a z pósrědnjenim sakskeje źěłoweje kupki „Serby w SPD“ jo pśepódał Měrćin Wałda zwězkowemu ministarjeju dossiery a hobzamknjenja Serbskego sejma. Huběrk „hustawa a pšawo“ źěkujo se za pódpěru z boka SPD.