Apel serbskich wosobinow k wólbam do 2. Serbskeho sejma

29. januara su w Němsko-Serbskim ludowym dźiwadle wuznamne serbske wosobiny w nowinarskej konferency swój apel serbskemu ludej k wobdźělenju na wólbach do 2. Serbskeho sejma wusměrili.

Nowinarsku konferencu nawjedowaše Benedikt Dyrlich, kiž zhromadnje z dalšimi přitomnymi podpisarjemi apela wuzběhny wažnosć wólbow Serbskeho sejma a šěrokeho wólbneho wobdźělenja. W swojich wuwjedźenjach rozłožichu, čehodla tute wólby směrnicowy rozsud za serbsku zhromadnosć woznamjenja.

Prěni podpisar Tomaš Rječka wustaji: „Kluč za dalewobstaće našeje rěče leži w šulskich ramikowych wuměnjenjach za naše dźěći. Tute dyrbja w našej ruce ležeć. Za to je kubłanska awtonomija ze sylnym ludowym zastupnistwom prawy puć. Tohodla wolće Serbski sejm, zo móhł wón tele žadanje přesadźić! “

Sobupodpisar Tomasz Nawka dodawa: „Stawizny nas wuča, zo je naš lud bjez swójskeje mocy rozsuda přeco zaso znowa pokazany na přichilnosć towaršnosće wjetšiny. Smy z tym hrajny bul zajimow druhich. Dlěje hač sto lět eksistuje zaměr, tutu bjezmóc přewinyć. Ze Serbskim sejmom je tuta wizija cyle bliska. Tuž namołwjam wšitkich, sobu wuzwolić a dobrym kandidatkam a kandidatam dowěru wuprajić.“

Dalše ćežišćo nowinarskeje konferency bě předstajenje ćežišćow kubłanskeho koncepta, naćiska statneho zrěčenja a wustawoweho procesa, kotrež su ze dźěła 1. Serbskeho sejma wušli. Naćiski a koncepty móža so pod www.serbski-sejm.de w meniju dokumenty dowidźeć.

Apel w formulaciji kaž tež lisćina podpisarjow ležitej jako přiłoha. Tole staj Tomaš Rječka, Marko Suchy, dr. Christiana Piniekowa, dr. Grit Lemke, dr. Viktor Zakar, Hella Stoleccyc, Róža Domašcyna, Benedikt Dyrlich, Reiner Nagel, dr. Pětr Kroh, Lutz Hillmann, Hanka Jenčec, Alexander Pólk, Wolfgang Krause, Ludmilla Budarjowa, Alfons Wićaz, Maja Nagel, Pawoł Rota, Jens Zahrodnik, dr. Pětr Wjacławk, Matthias Körner, Křesćan Krawc, Cosima Stracke-Nawka, Tomasz Nawka, dr. Arnošt Wirth a dr. Měrćin Wałda.

Wólby do 2. Serbskeho sejma su so jako ryzy listowe wólby 2024 zahajili a wotměwaja so paralelnje k wólbam zwjazkoweho sejma. Hač do 27. februara 2025 móža so wolerki a wolerjo na wólbnej stronje www.serbski-sejm-2024.de za wólby registrować kaž tež listy a fota kandidowacych wobhladać, zo bychu funděrowany rozsud tworili.

Kóžda/y wot 16 lět, kotraž/kotryž so serbskemu ludej přisłušaca/y čuje, njech dla pochada, rěče, kultury, bydlišća abo z druhich přičin, je k wólbam namołwjena/y.