Serbske ludowe zastupnistwo
Sorbische/wendische Volksvertretung

Katólscy a ewangelscy Serbja wuradźuja wo swojej nuzy dla pobrachowacych cyrkwinskich strukturnych reformow

Dnja 12. měrca 2020 zetkachu so w Njebjelčicach zastupjerjo ewangelskich a katólskich serbskich wosadow, zo bychu porěčeli dla nuzy serbskich křesćanow a wosadow při so bližacych cyrkwinskich strukturnych reformach.

Wosadny farar Michał Nawka a wjesnjanosta kaž tež zapósłanc sejma Tomaš Čornak staj k tomu witałoj z Hodźija fararja Christopha Rummela a čłona wosady a tohorunja zapósłanca sejma Měrćina Krawca.

W rozmołwje bu jasnje, zo wobě konfesiji před jara podobnymi problemami stejitej a zo dyrbjeli tuž fararjo a wosadne rady so při argumentowanju z wotpowědnymi cyrkwinskimi wjednistwami mjezsobu podpěrować, zo bychu skóncowanju serbskeho žiwjenja w cyrkwjomaj zadźěwałoj.

Zastupjerjo sejma chcedźa so tohorunja za to zasadźować a při tym na historisku zamołwitosć cyrkwjow napřećo serbskemu ludej kaž tež na komunalne nazhonjenja skedźbnjeć, hdźež po 30-lětnych naprawach centralizacije runje započa změna w myslenju. Wotpowědujo nowemu koaliciskemu zrěčenju matej zaso soburěčenje a samozamołwitosć lokalnych wosadow a wsow na wažnosći nabyć a zmylki zańdźenosće so skónčnje skorigować.

Rozmołwne koło je sej było wobjedne, zo so přez straty domizny a identity zawinowany wakuum we wsach a gmejnach dla zhubjenja we wjetšich strukturach wšě prócowanja ludźi za nje zakónči a zo samo sympatije za nowe a strašne identitarne hibanja zbudźić móže, přećiwo čemuž měła cyłkowna towaršnosć wšo činić, štož zamóže.

Wróćo