Přeprošenje na nowinarsku rozmołwu
Serbski sejm přeprošuje jara wutrobnje na nowinarsku rozmołwu do Berlina. Zapósłancy a Londonski prawizniski team renoměrowanych fachowcow čłowjeskeho a ludoprawnistwa informuja wo pozadkach a přichodnych kročelach k wotběžanemu ultimatumej Serbskeho sejma zwjazkowemu knježerstwu, prawa indigenity serbskeho ludu připóznawać, a staja so Wašim prašenjam.
Termin: póndźelu, 3. Julija 2023
Čas: 12:00 – 13:00 hodź.
Městno: schadźowanišćo Zwjazkoweje nowinarskeje konferency, Schiffbauerdamm 40, 10117 Berlin
Rozmołwni partnerojo:
Serbski sejm
- Jadwiga PJACEC, čłonka Serbskeho sejma, Njebjelčicy, DE
- Hajko KOZEL, čłon Serbskeho sejma a předsyda prawniskeho wuběrka, Njebjelčicy, DE
Ludoprawniski konsorcij Doughty Street Chambers London, UK
- prof. Marc WELLER, University of Cambridge, Doughty Street Chambers, London, UK
- Margherita CORNAGLIA, Doughty Street Chambers, London, UK
- Stephen POWLES KC, Doughty Street Chambers, London, UK (přez Zoom)
Temy rozmołwy:
- Oficialne zwěsćenje, zo třiměsačny ultimatum zwjazkowemu knježerstwu, připóznać indigenitne prawa serbskeho ludu, je formalnje pjatk, 23.06.2023 wo połnocy wotběžał
- Bilanca ultimatuma / 2 nowinarskej konferency z wulkej medijowej rezonancu
- Situacija serbskeho ludu w Zwjazkowej republice / skóržbje před němskimi a mjezynarodnymi sudnistwami a institucijemi
Pozadk:
Serbski lud přińdźe před něhdźe 1.500 lětami do kónčiny Łužicy, hdźež dźensa něhdźe 60.000 Serbow bydli. Serbski sejm, prěni w l. 2018 z powšitkownych, bjezposrědnich, swobodnych, jenakich a tajnych wólbow wušły parlament Serbow w Němskej, dźěła politisce na zakładźe Zakładneho zakonja a mjezynarodneho prawa a po konsensowym principje. Sejm wobsteji ze 24 čestnohamtskich zapósłancow a schadźuje so prawidłownje na so měnjacych městnach we Łužicy. Wšitke wobzamknjenja a protokole su swobodnje přistupne pod www.dokumenty.serbskisejm.de.