Próstwa wo spěchowanske srědki za wólby Serbskeho sejma zapodata

7. awgusta je Smy z. t., spěchowanske towarstwo za podpěru k wutworjenju prěnjeho demokratisce legitimowaneho ludoweho zastupnistwa Serbow - Serbski sejm, přepodało direktorej Załožby za serbski lud, Janej Budarjej, próstwu wo spěchowanske srědki ke kryću kóštow prawólbow do sejma.

Aleksander Polk, kotryž je próstwu hłownje wobdźěłał, wujasni: „Zawěsćenje financowanja je jedne z wažnych wuměnjenow k přewjedźenju prawólbow. Njesnadne kóšty zawinuje zjawnostne dźěło, kotrež so započnje wot wokomika wólbneje namołwy kaž tež trěbna identifikacija wolerjow, štož je při podźělnym statnym ludźe Serbow hižo něšto wosebiteho.“ Dr. Měrćin Wałda, rěčnik sejmoweje iniciatiwy a předsyda towarstwa k tomu doda: „W ludowym prawje zawjazuja so čłonojo statneho zhromadźenstwa, přizwolić swojim mjeńšinam/podźělnym statnym ludam w samozarjadnistwje kulturnu awtonomiju. Tole implicěruje wězo tež k tomu trěbnych demokratiskich strukturow, štož rěka parlament, a k dispozicijistajenje k tomu trěbnych finančnych srědkow.“