Serbski sejm wjednistwo Domowiny k dalšim rozmołwam bjez wuměnjenjow přeproša, zo bychu so skónčnje šansy za demokratiske samopostajenje Serbow zapřijeli

W lisće na předsydu a Zwjazkowe předsydstwo Domowiny, Zwjazk Łužiskich Serbow z. t. přeproša Serbski sejm předsydstwo Domowiny na dalše rozmołwy bjez předwuměnjenjow. „Smy w lisće hišće raz zdźělili a wopodstatnili, zo Serbski sejm njezastupi do Domowiny. Nimo toho smy jasnje pokazali, zo ani diskusija wo zastupje ani rozdźěle w měnjenjach njemóža přičina być, nuznu wotewrjenu a na fakty bazowanu diskusiju k fatalnej situaciji serbskeho ludu w někotrych wažnych wobłukach, k nutřkownym a wonkownym přičinam za to kaž tež k wjele lubjacym móžnym rozrisanjam přez samopostajenje a samozarjadowanje dale přesuwać,“ rjekny starobna prezidentka Serbskeho Sejma, Edith Pjeńkowa a doda při tym: „Domowina njeby dale wuzamknjena być dyrbjała wot sobuskutkowanja na wulkich politiskich wusměrjenjach noweho statneho zrěčenja.“