Smy z.t. sobustawska zhromadźizna nominuje kandidatki a kandidatow za Serbski sejm

Dnju 11. septembra wotmě so w serbskej wsy Njebjelčicach sobustawska zhromadźizna Smy z.t. W srjedźišću zhromadźizny stejachu wažne wólby k nominowanju kandidatkow a kandidatow za přichodne wólby do 2. Serbskeho sejma, serbskeho parlamenta.

Sobustawska zhromadźizna nominowaše a wuzwoli jednohłósnje sćěhowace wosoby, kotrež běchu swoju kandidaturu přiwzali: dr. Stanisława Nawku, Carolu Geppertowu, dr. Tomaša Wornarja a Hajka Kozela.

Tute štyri wosobiny budu Smy z.t. při wólbach Serbskeho sejma zastupować a so za naležnosće serbskeje zhromadnosće zasadźeć. Towarstwo Smy z.t. je horde na to, tajkich angažowanych a kompetentnych zastupjerjow nastajić móc a přeje kandidowacym wjele wuspěcha při přichodnych wólbach.

Smy z.t. je serbske towarstwo, kotrež so za zachowanje a spěchowanje serbskeje rěče, kultury a identity zasadźuje. Towarstwo hraje aktiwnu rólu w serbskim zhromadźenstwje a přinošuje ke skrućenju politiskeho sobupostajowanja Serbow.

Hač do 11.10.2024 móža serbske towarstwa a iniciatiwy kandidowacych za 2. Serbski sejm nastajić a zapodać. Dalše informacije pod www.serbski-sejm-2024.de