Wulke wužadanja žadaja sebi nowe puće

Na přeprošenje Serbskeje rady zetka so 31. januara skupina zapósłancow Serbskeho sejma z radźićelemi Serbskeje rady na prěnju konstruktiwnu wuměnu. Wosebite ćežišća intensiwneje rozmołwy běchu předstajenje a wuměna pozicijow k zesylnjenju serbskeho kubłanja a k noworjadowanju Serbskeho zakonja. Aneta Zahrodnikowa, předsydka kubłanskeho wuběrka Serbskeho sejma, rozłoži radźićelam konkretne krótkodobne a srjedźnodobne naprawy kaž tež dołhodobne zaměry Serbskeho sejma k wozrodźenju serbskeho kubłanja a serbskeje rěče. Ćežišćo jeje wuwjedźenjow bě zesylnjenje skutkownosće kubłanskich strukturow přez samopostajowanje a wutwar samozarjadnistwa serbskeho kubłanja.

Nowela Serbskeho zakonja běše dalši dypk dnjoweho porjada. Wobdźělnicy běchu sebi přezjedni, zo je noworjadowanje Serbskeho zakonja nuznje trěbne. Serbski sejm potwjerdźi žadanje za statnym zrěčenjom mjez Serbami a statom. Předsyda prawniskeho wuběrka, Hajko Kozel, rozkładźe čłonam Serbskeje rady trěbnosć a lěpšiny zwjazkowe kraje přesahowaceho statneho zrěčenja. Na tute wašnje, kotrež so w druhich wobłukach hižo wuspěšnje praktikuje, móhła so trajna, daloko sahaca a prawnostatna baza stworić.

Na kóncu połdrahodźinskeje rozmołwy w wzajomnej atmosferje informowaše Tomaš Čornak, nawoda wólbneho wuběrka, radźićelow wo stawje planowanja předstejacych wólbow do druheje legislaturneje periody Serbskeho sejma.

Byrnjež wobě stronje hladajo na wobsah a spěšnosć přichodnychs krokow zwoprawdźenja naročnych wužadanjow rozdźělneho měnjenja byłoj, wopodstatništaj sebi přezjednosć w zaměrach a ćežišćach, kotrež dyrbjeli so w přichodnych lětach nuznje zeskutkownić.