Zarjadniske sudnistwo Drježdźany: Próstwa wo spěchowanje dźěła Serbskeho sejma wostanje najprjedy wotpokazana

Před 5 lětami je towarstwo Smy z.t. zapodało próstwu wo spěchowanske srědki pola Załožby za serbski lud, zo by dźěło Serbskeho sejma ze zarjadniskim běrowom podpěrała. Załožba to tehdy wotpokaza. Nic přećiwo wotpokazanju, ale njedosahaceho wopodstatnjenja dla skoržeše Smy z.t. před Drježdźanskim zarjadniskim sudnistwom. Sudnistwo wotpokaza skóržbu po jednanju dnja 18.11.2025.

Serbski sejm tutón rozsud wobžaruje, skedźbnja pak na to, zo je sudnistwo centralne dypki spěchowanskeje praksy załožby njewobkedźbowane wostajiło. Wona steješe w srjedźišću jednanja – a runje tu pokazuja so grawěrowace znapřećiwjenja, kotrež njemóžeše sudnistwo rozpušćić.

W jednanju a we wusudźe https://www.medienservice.sachsen.de/medien/news/1092590 so wujasni:

• Drje spěchuje załožba dźěło Domowiny, njewobhladuje pak tute srědki eksplicitnje jako spěchowanje politiskeho dźěła. To njeje dźěl załožboweho zaměra.

• Róla jako politiske zastupnistwo so Domowinje "wotwonka staji". Wona wupraja drje so politisce, ale jenož, hdyž so wona wotwonka praša.

• Dokelž njedóstawa Domowina spěchowanje za politiske dźěło, nima tež Serbski sejm z přičin jenakeho wobchadźenja prawo na tajke spěchowanje.

Z toho sćěhuje zasadnje: Wobsteji Serbski sejm, kotryž so jako zastupnistwo Serbskeho ludu a potencielny spěchowanski předmjet statnych srědkow ani wot Załožby za serbski lud, ani wot zarjadniskeho sudnistwa do prašenja njestaja.

Ale wurostu so tři konflikty:

1. Statne zakonje njepředwidźa žane politiske zastupnistwo serbskeho ludu. Přiwšěm trjeba stat ze serbskeho ludu politiske stejišća a praša so za tym. Wotmołwy dósta dotal wot towarstwa bjez demokratiskeje legitimacije. Tutu politisku dźěru je Serbski sejm wot 2018 zawrěł. Prawu na samopostajowanje ludow a demokratiske zasady sćěhujo, trjeba serbski lud swobodnje wolene politiske zastupnistwo. Ze Serbskim sejmom ma tajke zastupnistwo. Sakski serbski zakoń ma so wotpowědnje přiměrić.

2. Stat ma připóznać, zo ma so politiske dźěło serbskeho ludu runje tak spěchować kaž tamne wobłuki, kotrež so w załožbowym zaměrje Załožby za serbski lud mjenuja. Wón dyrbi wujasnić, zo je tež demokratiska, politiska kultura elementarny dźěl serbskeje kultury - abo předmjety spěchowanja wudospołnjeć. Załožbowy zaměr ma so wotpowědnje aktualizować - chibazo chce stat Serbski sejm jako politiske zastupnistwo Serbskeho ludu na hinaše wašnje rjadować a spěchować.

3. Domowina, Zwjazk Łužiskich Serbow z.t. definuje politiske dźěło jasnje jako jedyn ze swojich hłownych nadawkow (nóžka: kapitl 7 "Politiska participacija" w programje Domowiny; https://www.domowina.de/hsb/domowina/hlowna-zhromadzizna/17-hlowna-zhromadzizna-domowiny-2832015-w-haslowje/program-domowina-2025). Hižo nětko wužiwa wona njesnadne dźěle wot Załožby za serbski lud wukonjanych spěchowanskich srědkow za swoje politiske dźěło. W zmysle jenakeho wobchadźenja ma so tež dźěło Serbskeho sejma spěchować.

Z tym zwjazane dyrbi so prašenje stajić, hač je załožba po tu wozjewjenym swójskim měritku přez lěta sem zjawne pjenjezy zaměrej so spřećiwjace rozdźěliła.

Tute njerozrisane zasadne prašenja njewoznamjenja žane pódlanske dypki, ale potrjechja jadro serbskeho samozarjadnistwa a prawnisku wěstotu statneje mjeńšinoweje politiki.

Towarstwo Smy z.t. budźe wusud ze Serbskim sejmom swědomiće pruwować a wo dalšich prawniskich krokach wuradźować. Zdobom so załožba a ju nošace statne knježerstwa namołwjeja, skónčnje jasnosć wo prawniskej róli politiskeho zastupnistwa Serbow wutworić. Demokratisce woleny parlament njesmě so trajnje do bjezprawneho wakuuma tłóčić.

Žórło: program DOMOWINA – 2025, Kap. 7 - politiska participacija
Domowina zastupuje na zakładźe rjadowanjow Serbskeju zakonjow zajimy serbskeho luda. Wona stara so wo rozšěrjenje sobu- a samopostajowanskich prawow a winowatosćow předewšěm w serbskich politiskich, kulturnych a šulskich naležnosćach. Jednamy ze wšěmi demokratiskimi politiskimi stronami, zapósłancami a gremijemi na komunalnej, krajnej, zwjazkowej kaž tež europskej runinje. Zaručamy politisku artikulaciju Serbow za zwoprawdźenje serbskich zajimow a přesadźenje našich prawow a delegujemy za to serbskich zastupjerjow do poradźowacych a rozsudźacych gremijow.
Rady, přirady a wuběrki kaž tež zamołwići resp. społnomócnjeni za mjeńšinowe abo serbske naležnosće su wažni partnerojo a multiplikatorojo při zwoprawdźenju zajimow Serbow na wšěch politiskich runinach.
Zawěsćamy z našim politiskim dźěłom zdźerženje trěbnych financielnych zakładow za serbske potrjeby w financnym dojednanju mjez Zwjazkom a krajomaj Braniborskej a Sakskej kaž tež dalše spěchowanske srědki.